بالىغا ئۇخلاشتىن بۇرۇن سۈت ئىچكۈزمەڭ
بالىلارنىڭ يۇتقۇنچاق يولىغا ئاسانلا كېرەكسىز نەرسىلەر يىغىلىۋېلىپ، نەپەسلىنىش يولى تەكرار يەللىكلىنىپ قالىدۇ. بالىلار ئۇخلاشتىن بۇرۇن سۈت ئىچسە، يۇتقۇنچاق يولىنىڭ يەللىكلىنىشىنى تېخىمۇ كۈچەيتىۋېتىدۇ. بالىلارنىڭ فىزىيولوگىيەلىك تۈزۈلۈشى ئالاھىدە بولىدۇ، بولۇپمۇ بوۋاقلارنىڭ بۇرۇن ۋە يۇتقۇنچاق قىسمى تارراق ھەم تۈز بولىدۇ. بادام بەزنىڭ قوغدىنىش ئىقتىدارى بولسىمۇ، ئەمما سۈت ئەسلىدىلا باكتېرىيە ئۆستۈرگۈچ بولۇپ، بالىلار سۈت ئىچىپلا ئۇخلىسا، يۇتقۇنچاق يولىدا قېپقالغان سۈت قالدۇقى ئاسانلا باكتېرىيەنىڭ قايتا يېتىلىشىنى كەلتۈرۈپ چىقىرىدۇ.
بالىلارنىڭ ئەزالىرى بىر – بىرىگە يېقىن بولىدۇ، مەسىلەن: قۇلاق، يۇتقۇنچاق نەيچىسى كەڭرەڭ، قىسقا ھەم تۈز. شۇڭا ئۇ ئاسانلا بوغۇز يەللىكىنى كەلتۈرۈپ چىقىرىپلا قالماي، ئوتتۇرا قۇلاق يەللىكىنىمۇ كەلتۈرۈپ چىقىرىدۇ. ئۇنىڭدىن باشقا، بالىلار ئۇخلاشتىن بۇرۇن سۈت ئىچكەندە، ئەسلىدىلا ئارام ئېلىش ئالدىدا تۇرغان ھەزىم قىلىش سىستېمىسى قايتىدىن خىزمەتكە چۈشۈپ، ئاشقازان، قىزىلئۆڭگەچنىڭ تەتۈر ئېقىشىنى ئېغىرلىتىپ، ئۇنىڭدىن چىققان ئاشقازان كىسلاتاسى نەپەس سىستېمىسىنى غىدىقلاپ، يەللىكنى كەلتۈرۈپ چىقىرىدۇ. ھەزىم قىلىش سىسېتىمىسى ئالامەتلىرى مەسىلەن: ياندۇرۇش، قورساقنىڭ يۇقىرى قىسمى ئاغرىش قاتارلىقلاردىن باشقا، يەنە نەپەس توختاپ قېلىش، كاناي يەللىكى، ھاسىراش، ئۆپكە يەللىكى، سوزۇلما خاراكتېرلىك يۆتەل، ئاۋاز پۈتۈش ۋە بۇرۇن كاۋىكى يەللىكى قاتارلىق كېسەللەرنى كەلتۈرۈپ چىقىرىدۇ. دوختۇرنىڭ تەۋسىيەسى: 1.بالا سۈت ئىچىپ بولغاندىن كېيىن، بىر قانچە قوشۇق قايناقسۇ ئىچۈرۈۋېتىش كېرەك. 2. ئامال بار سۈت ئىچىش ۋاقتىنى بىر سائەت ئالدىغا سۈرۈپ، بالىنىڭ سۈت بوتۇلكىسىنى تۇتۇپ ئۇخلاپ قېلىش ئادىتىنى ئۆزگەرتىش كېرەك. .3.چوڭراق بالىلارغا ھېكايە ئېيتىپ بېرىشتەك ئۇسۇللار بىلەن بالىنىڭ دىققىتىنى چېچىپ، ئۇخلاشتىن بۇرۇن سۈت ئىچىدىغان ئادىتىنى ئۆزگەرتىش كېرەك.
|
